Waris Dirie (yo o tshotsweng ka ngwaga wa 1965) ke motlelara wa MoSomalia, mokwadi, modiragatsi le molwela-ditshwanelo tsa batho mo ntweng kgatlhanong le go Kgaolwa ga Basadi (FGM). Go tloga ka ngwaga wa 1997 go ya kwa go wa 2003, e ne e le moemedi yo o kgethegileng wa lekgotla la Ditšhaba Tse di Kopaneng(UN) kgatlhanong le go kgaolwa ga basadi dirwe tsa tlhakanelodikobo. Ka ngwaga wa 2002 o ne a tlhoma mokgatlho wa gagwe kwa Vienna, e leng Desert Flower Foundation.
"Boikanyegi jwa basadi bo tshwanetse go bonwa ka go tshepana le lorato, go na le go dira dingwao tsa bogagapa. Nako e gorogile ya go tlogela mekgwa ya bogologolo ya go boga."
Waris Dirie ka ngwaga wa 2010"Metsotswana mengwe le mengwe e le lesome le bongwe mosetsanyana o a kgaolwa ditokololo golo gongwe mo lefatsheng, ga go amane ka gope le bodumedi, setso kgotsa ngwao mme go kgatlhanong le ditshwanelo tsotlhe tsa batho ke molato fela o o setlhogo o o sa amogelesegeng.
"Ke ne ke itse gore bontsi jwa basadi ba ba nyetsweng mo tikologong ya gaetsho ba ne ba itshokela sengwe le sengwe . Go sotlwa gope, go tlhoka tsholofelo, mme ke ne ka akanya, a ke ne ke le fano go dirisiwa le go sotlwa? Ke ne ke itse gore go na le dilo tse dintsi tse nka di dirang ka botshelo jwa me, mme ka melawana ya me."
"Ke ne ke itse fela gore ke tshwanetse go bolelela lefatshe gore go na le pogiso, ntwa ya sephiri kgatlhanong le basadi. Mme se ga se ntwa ya motho a le mongwe – rotlhe re tshwanetse go dira sengwe."
"Se tota se neng se dira gore ke tseye boemo ke gore ga go ope yo o neng a dira sepe."
"Mme o mphile leina ka kgakgamatso ya tlholego: Waris o raya sethunya sa sekaka. Sethunya sa sekaka se thunya mo tikologong e e senang sepe mo ditshedi di le mmalwa fela di kgonang go tshela mo go yone."
"Ke ikutlwa gore Modimo o dirile mmele wame o itekanetse ka tsela e ke tsetsweng ka yone. Go tswa foo motho o ne a ntsietsa, a amoga maatla ame, mme a ntlogela ke le segole. Bosadi jwame bo utswile. Fa e le gore Modimo o ne a batla gore dikarolo tseo tsa mmele di se ka tsa nna teng, ke ka ntlha ya eng fa a ile a di bopa?"
"Ke rapela fela gore letsatsi lengwe go se nne le mosadi ope yo o tla tshwanelwang ke go itemogela botlhoko jo. E tla nna selo sa nako e e fetileng. Batho ba tla re "A o utlwile, go kgaola dirwe tsa basadi go thibetswe kwa Somalia?" Ebe lefatshe le lengwe le latela, le lengwe le latela, jalo jalo, go fitlhela lefatshe le siametse basadi botlhe. Letsatsi leo le tla nna letsatsi le le itumedisang jang ne, mme ke sone se ke se berekelang. In'shallah, fa Modimo a rata, go tla diragala."
"Ditsala di le dintsi di ile tsa bontsha gore di tshwenyegile ka gore mongwe yo o tlhoafetseng mo bodumeding o tla leka go mpolaya fa ke ya kwa Aforika. Kana ke tla bo ke bua kgatlhanong le bokebekwa jo bontsi jwa batho ba ba dumelang mo dithutong tsa motheo ba bo tsayang e le mokgwa o o boitshepo. Ke tlhomamisegile gore tiro yame e tla nna kotsi, ebile ke a dumela gore ke tshogile.... Mme tumelo yame e mpolelela gore ke nne thata, gore Modimo o nketetse mo tseleng e ka lebaka. O na le tiro e ke tshwanetseng go e dira. Se ke thomo yame. Mme ke dumela gore nako e telele pele ga letsatsi le ke tsetsweng ka lone, Modimo o tlhophile letsatsi le ke tla swang ka lone, ka jalo ga ke kake ka fetola seo. Fa re sa ntse re letile, nka nna ka tsaya tshono, ka gonne ke sone se ke se dirileng botshelo jwame jotlhe."
